CEBU, Philippines - Ang kapolisan sa dakbayan sa Talisay nagsugod na og roving niadtong Sabado diha sa lima ka mga sam-ang sa siyudad, matud pa ni Inspector Hugo Rio Ipong sa Talisay City Police Station (TCPS) nga nahinabi sa Banat News kagahapon.
Matud ni Ipong nga ubay-ubay na ang mianha sa mga sam-ang kinsa nanglimpiyo sa mga lubong sa ilang mga minahal sa kinabuhi nga mitaliwan na ngadto sa laing kalibutan.
Apan sukad niadtong Sabado wala silay nadawat nga reklamo kalabot sa pagsaulog sa Kalag-kalag.
Gilauman sa kapolisan nga karong adlawa, Nobiyemnbre 1, 2010 mohugop ang daghang tawo sa mga sam-ang.
Uban sa mga tawo nga moanha sa mga sam-ang dili lang modagkot apan mobilar pa gyud sa mga lubong sa ilang mga minahal sa kinabuhi.
Ang lima ka sam-ang mao ang pampublikong sam-ang sa barangay Poblacion, Cansojong, Tanke ug duha ka pribadong sam-ang nga mao ang Evergreen Memorial Garden sa barangay San Roque habig sa south coastal road ug Cebu Memorial Garden sa barangay Mohon. Si Superintendent Henry Biñas, hepe sa TCPS nagkanayon nga karong adlawa aduna siya’y idestinong mga polis sa matag sam-ang ug gawas niini magbutang usab sila og police assistance booth duol sa baba sa sam-ang aron adunay maduolan ug mapangayoan og tabang ang mga tawo nga moanha sa mga menteryo.
Ang mga multiplier force nga sakop sa Talisay City Intelligence Bureau (TCIB) ug mga tanod ipakatap usab diha sa mga sam-ang aron motabang sa mga polis sa pagmintenar sa kahapsay ug kalinaw.
Si Biñas mipahimangno pag-usab sa publiko nga gidili ang pag-inom-inom og ilimnong makahubog sa sulod sa mga sam-ang, gidili ang pagsaba-saba lakip na ang sugal aron malikayan ang kasamok.
Ang mga manindahay usab dili tugotang makabaligya og mga ilimnong makahubog sa duol sa sam-ang. (BANATNEWS)