5-anyos gi-hostage

CEBU, Philippines - Usa ka amahan nga giingong adunay sakit sa pangisip ang mi-hostage sa iyang kaugalingong anak pasado alas-7 sa gabii niadtong milabay’ng Huwebes diha sa barangay Putat lungsod sa Tuburan.

Ang amahan nga mi-hostage sa anak nagpangidaron og 32-anyos molupyo usab sa maong lugar giingong adunay history sa mental illness ug mi-hostage sa 5-anyos nga anak niining lalaki.

Base sa imbestigasyon sa kapolisan nasayran nga ang inahan sa suspetsado midangop sa kapolisan dihang iyang nabantayan ang suspetsado nga nagpunay og inom nianang pagkagabii sa Miyerkules.

Matud pa niini nga sukad sa paglingkod sa suspek ug nag-inom wala na niini buhii ang anak samtang naggunit pud og kutsilyo.

Naabtan pa sa kapolisan ang suspek nga naglingkod sa ubos nga bahin sa ilang panimalay ug naghupot og lima ka pulgadas nga lansang nga maoy gition sa iyang anak.

Ang kapolisan misuway sa pakig-negotiate sa suspetsado ug gitumanan sa gipangayong Kulafu pinaagi sa pagpalit niini apan wala nila kini ihatag. Gihatagan usab nila kini og pagkaon lakip na sa bata. Apan dihang nabantayan nilang padulong kining mosaka sa balay diha-diha daling gilayog ni SPO3 Carlo Canseko ang suspetsado samtang daling gibunlot nila ni PO2 Bismarck Babiera ug SPO1 Ramon Monteclaro ang bata ug naluwas kini.

Sa pakighinabi sa Banat News kang SPO3 Carlo Canseko mibutyag nga gibiyaan sa iyang asawa ang suspek. Giingong magpunay og inom ang suspek ug dili na mokaon og tarong maong gituohang misuol ang sakit niini. (BANATNEWS)