LMP pabor nga SK wagtangon

CEBU, Philippines - Uyon ang presidente sa League of Municipalities of the Philippines (LMP) Cebu Chapter nga wagtangon na ang Sangguniang Kabataan (SK) sa barangay.

Matud pa ni LMP Cebu Chapter president Dumanjog mayor Nelson Garcia nga dili maayo nga ilambigit sa kahugaw sa politika ang mga kabataan pinaagi sa election.

Kini tungod kay sayo kaayo makat-on sa kurapsyon ang mga kabataan kun magpadayon ang SK election.

Sigon pa ni Garcia nga iyang naobserbahan sa bag-o lamang nga nahuman nga barangay ug SK election nga ang mga kabataan nakat-on na sa pagpalit og botos sa kantidad gikan sa 50 pesos ngadto na sa usa ka libo ka pesos.

Gisugyot ni Garcia nga mas maayo nga ang mayor na lamang sa lungsod o ba kaha sa siyudad ang motudlo og representante sa SK sa matag barangay.

Kini tungod kay ang mayor o ba kaha ang mga barangay kapitan mao ra man gihapon ang magbuot sa 10 porsiyento nga gahin alang sa mga kabataan tungod kay linghod ug wala pay kabangkaagan ang mga SK officials. (BANATNEWS)