Rama nagdumili paghingalan sa ABC pres
CEBU, Philippines - Nagdumili gihapon si Mayor Michael Rama sa paghingalan sa gusto niya nga mamahimong sunod nga presidente sa Association of Barangay Councils (ABC), nga mohulip kang Eugenio Faelnar sa Barangay Guadalupe.
Gihangop hinuon sa mayor ang sugyot ni Kongresista Tomas Osmeña nga matud pa pipila sa mga kapitan nga dunay potensiyal nga mahimong presidente sa ABC mao sila si Michael Ralota sa T. Padilla ug Manuel Guanzon sa Capitol Site.
Una na nga gipadayag ni Osmeña nga ganahan siya nga niining higayona, gikan na pud sa amihanang distrito sa siyudad ang makahupot sa nahisgutang puwesto.
Sa 80 ka barangay sa siyudad, 46 niini ang nahimutang sa amihanang distrito.
Samtang si Rama mipadayag usab nga parehong dunay kapabilidad sila si Ralota ug Guanzon nga mangulo sa ABC gumikan sa maayong rekord nila sa ilang mga barangay.
Usa ka architect si Ralota busa magamit ang iyang mga kaalam kung duna sila’y plano nga mga proyekto sa barangay.
Samtang si Guanzon kanhi presidente sa Barangay Councilor's League-Cebu Chapter ug presidential adviser for the Visayas ni kanhi Presidente Gloria Macapagal Arroyo.
Aminado hinuon si Rama nga ubay-ubay pa nga mga kapitan ang adunay potensiyal nga mahimong ABC president busa kinahanglan kini og igong mga pulong. (BANAT)
- Latest
- Trending
