CEBU, Philippines - Negosyante og baboy anaa karun sa kritikal nga kahimtang human maputos sa samad tinigbasan pasado alas-7 sa miaging gabii sa barangay Cogon-East sa lungsod sa Carmen.
Ang biktima nailhan nga si Viviano Barro, 59, molupyo sa maong lugar samtang ang suspetsado nailhan usab nga si Jerwin Pongautan, 19 , molupyo sa barangay Luyang sa maong lungsod.
Base sa imbestigasyon sa kapolisan sa lungsod sa Carmen nasayran nga ang biktima ug ang suspetsado pulos hubog ug nagkasugat sa ilang gilakwan ug miresulta sa ilang panaglalis.
Tungod sa kainit sa ilang panaglalis kalit lang nga miibot ang suspetsado nga adunay gitas-ong 19 pulgadas nga giingong gipanag-iya sa biktima.
Ang biktima nakaangkon og mga samad tinigbasan sa iyang ulo, nawong ug tiyan ug kasamtangan pa kini nga anaa karun sa usa ka hospital sa syudad sa Sugbo.
Samtang matod pa ni SPO1 Ricardo Enriquez sa pakighinabi sa Banat News mibutyag kini nga sa diha nga iyang naka-estorya ang suspetsado mibutyag kini ngadto kaniya nga wala gayud siya masayod sa iyang gibuhat.
Gani gihulagway kini niya nga bunga lang sa iyang kahubog ug dako usab og pagmahay sa suspetsado.
Kasamtangan karun nga nagtingkagol sa karsel sa lungsod sa Carmen ang suspetsado samtang nag-atubang kini sa kasong frustrated homicide nga gi-andam sa kapolisan nga mapasaka batok kniya. (BANAT)