CEBU, Philippines - Gumikan sa nagpadayong gubat ug ang kalangay sa pagkuha og deoxyribonucleic acid (DNA) samples gikan sa mga kabanay sa mga nabiktima sa pagkahagsa sa abyon sa Afghanistan maoy gitumbok nga hinungdan sa pagkalangay sa pagdala sa ilang mga patay’ng lawas dinhi sa Sugbu.
Matud pa ni Nella Padura ang kapikas sa retiradong si 2Lt. Eduardo Padura (biktima) nagpaabot pa sila sa mga eksperto nga mokuha sa ilang DNA samples.
Kini maoy gamiton sa pagtakdo sa mga samples nga makuha gikan sa mga patay’ng lawas sa mga Filipinong crew sa nahagsang abyon sa Transafrik duha ka semana na ang nakalabay sa Kabul, Afghanistan.
Matud pa ni Padura ang opisyal sa Transafrik sa United Arab Emirates (UEA) nga si Benny Banta mipadayag nga gumikan sa nagpadayong tensiyon sa nasud sa Afghanistan hangtod karon layo pa ang posibilidad nga madala dinhi sa Pilipinas ang mga patay’ng lawas.
Ang maong abyon adunay walo ka crew, unom niini mga Filipino lakip na si Padura ug laing duha ka kanhi mga sakop usab sa Philippine Air Force nga taga Lapulapu nga sila si Bernardo Castillo ug Welo Elbanbuena ug laing tulo usab nga taga Luzon . (BANAT NEWS)