Nangabit og kuryente 'konbiktado

CEBU, Philippines - Duha ka tawo ang gisentensyahan sa hukmanan nga mabilanggo gumikan sa illegal nga instalasyon og kuryente sa managlahing lugar ning dakbayan sa Sugbo matud pa ni Ethel Natera, tigpamaba sa Visayan Electric Company (Veco).

Sa iyang gipadalang Press Release sa Banat News, giila ni Natera ang mga konbiktado sa korte nga sila si Richard Milagrosa ug Roberto Mabatid Borja, pulos mga hingkod nga nagpuyo sa nagkalainlaing lugar ning dakbayan sa Sugbo.

Sumala ni Natera nga segun sa gipakanaog nga hukom ni Judge Sylvia Aguirre Paderanga sa Regional Trial Court Branch 16, gisentensyahan niini si Milagrosa nga mabilanggo sulod sa minimum nga 4 ka tuig ug l ka adlaw, ngadto sa maximum nga 6 ka tuig ug usa ka adlaw.

Samtang si Borja gihukman usab ni Judge Silvestre Maamo sa RTC Branch 17 nga mabilanggo   gikan sa 2 ka tuig, upat ka buwan ug usa ka adlaw ngadto sa unom ka tuig ug l ka adlaw.

Sumala ni Natera nga ang kaso ni Milagrosa nanukad niadtong Oktobre 7, 2006, sa dihang nasakpan kini uban sa iyang mga higala nga mikabit og kuryente sa linya sa Veco aron ikonektar nga walay metrohan ngadto sa sulod sa CRCI Compound sa barangay Banilad, dakbayan sa Sugbo.

Samtang si Borja nadakpan usab sa mga barangay tanod didto sa barangay Centro Alaska, ning dakbayan sa Sugbo niadtong Nobyembre 11, 2008 nga nangabit gihapon og kuryente sa linya sa Veco alang sa mga panimalay sa ilang lugar nga walay pananghid sa tagdumala sa Veco.

Matud pa ni Natera nga pinaagi niining pagkakonbikto nila ni Milagrosa ug Borja, lakip usab ni Krasker Flores   kinsa unang nakonbikto sa miaging buwan, usa ka pagpakita sa taga Veco nga dili molugak sa iyang lakang sa paggukod niadtong mga tawo nga masakpang mangawat og kuryente.

Miingon si Natera nga mahinangop kaayo sila kun may mosumbong kanilang mga molupyo bahin sa mga tawong mangawat og kuryente sa nagkalainlaing lugar ning dakbayan sa Sugbo.  – BANAT NEWS