CEBU, Philippines - Giangkon ni 6th district Congressman Gabriel Luis ‘Luigi’ Quisumbing nga naglisod siya sa paghimo sa siyudad sa Mandaue nga ma-lone district.
Matud pa ni Quisumbing nga nadawat na niya ang resolusyon sa konseho sa siyudad sa Mandaue nga naghangyo kaniya nga mupanday og balaodnon nga maghimo sa Mandaue nga lone district.
Apan iyang gitataw nga hayan nga dili gyud mahimong ma-lone district ang Mandaue bisan kun kwalipikado kini tungod kay mabiyaan ang lungsod sa Cordova ug Consolacion, kay kining duha dili mahimong usa ka distrito tungod sa ilang distansya.
Matud pa ni Quisumbing nga kun ipamugos niya ang maong balaodnon nabalaka siya nga sa higayon nga molampos siya may mokiha na usab sa Mandaue ngadto sa Korte Suprema ug mahisama na usab unya sa 16 ka mga bag-ong siyudad nga nahibalik sa pagkalungsod tungod sa pagbuot sa labaw’ng hukmanan. (BANATNEWS)