CEBU, Philippines - Nababha ang bukobuko sa usa ka manghod human kini unaya og tigbas sa iyang magulang didto sa sitio Tabok sa barangay Looc, dakbayan sa Danao sa miaging buntag.
Si SPO4 Edgar Gomez sa kapolisan sa nahisgotang dakbayan nga nahinabi sa Banat News miila sa biktima nga si Jaime delos Santos, 39, minyo, nga nagpuyo sa maong dapit samtang ang suspetsado mao usab si Eduardo delos Santos, 42 , magulang ug silingan ra sa biktima.
Sumala sa imbestigasyon sa kapolisan nasayran nga nagkalalis ang managsoon ug dihang nakabsan na sa katarongan ang suspetsado mikuha kini og sundang dayong tigbas sa biktima.
Ang biktima kinsa may kaabtik, nakalihay og dyutay busa imbis ulo niya maoy mabugha, ang iya rang bukobuko maoy nabaha.
Ang biktima daling gihatod ngadto sa Danao District Hospital samtang gipangita pa sa kapolisan ang suspetsado human kini makasibat. (BANAT NEWS)