82 ka sitio sa Carcar aduna nay kuryente

CEBU, Philippines - Mga kanhi walay kuryenteng barangay sa Carcar hingpit nang nasug-an sugod niadtong Martes sa gabii human sa pormal nga seremonya sa pagpasiga sa switch sa proyekto ni Kong. Eduardo Gullas inabagan sa Cebu Electric Cooperative Inc. (CEBECO).

Niadtong Martes sa gabii si Gullas, si Padre Francisco “Paking” Silva, kanhi presidential adviser sa rural electrification ug National Electrification Administration (NEA) ug ang pangulo sa NEA nga si Edita Bueno maoy nangulo sa switch on ceremony nga gipahigayon diha sa Carcar City gym.

Ang maong symbolic energization ceremony gipahigayon atol sa ika-80 nga adlaw’ng natawhan sa kongresista kinsa mao usab ang mihatag sa P20 milyones nga pundong gahin sa nahisgutang proyekto.

 Ang electrification project nga ubos sa CEBECO 1 area adunay benepisyaryo gikan sa 82 ka mga sitio ug 14 ka barangay sa lungsod sa Carcar.

Atol sa seremonyas, ang mga kapitan sa mga barangay nga nakabenepisyo sa proyekto ang gipatagsa-tagsa usab sa pagpa-switch on sa suga nga diha sa dakong mapa nga nagtumong sa tagsa-tagsa nila ka mga barangay.

Ang mga sitio sa barangay Ocaña mao lang ang wala maapil sa nahisgutang proyekto apan si Gullas mipasalig nga maapil na kini sa ika-duhang hugna sa rural electrification project sa Carcar.

Si Silva kinsa usa ka Carcaranon mihangop sa proyekto bisan og ang Carcar mabalik kini ngadto sa pagka-lungsod.

Ang cityhood sa Carcar, Naga ug Bogo nagtakilid karon human sa ulahing hukom sa Supreme Court (SC) nga nagkanayon nga ang charter sa maong mga lugar unconstitutional.

Ang nahisgutang hukom sa SC dili pa final ug gihatagan pa og higayon ang 16 ka mga siyudad sa pagduso sa ilang motion for reconsideration.

Si Gullas mibutyag nga ang mga kongresista saVisayas ug Mindanao nagkahiusa sa pagduso sa P2 bilyones nga budget aron ang NEA makabaton og pundo sa sunod tuig.   – BANAT NEWS