Nadugta nga babaye kit-an

CEBU, Philippines - Usa ka babayeng gituohang adunay sakit sa pangisip ang napalgang patay sa kalibunan nga gitabonan na og lukay pasado alas-12 sa udto sa miaging adlaw sa barangay Sacsac sa lungsod sa Pinamungajan.

Apan ang kapolisan naglisod sa pag-establisar kun gituyo kini sa pagpatay ug namatay lang kini tungod sa sakit gumikan sa kadugta na sa lawas ni Basilia Mainit, 28, molupyo sa sitio Ulohan sa maong lugar.

Ang patay’ng lawas napalgan sa usa ka mangangahoy nga si Reynaldo Balansag Jr. nga nahiagi sa maong lugar.

Base sa gihimong imbestigasyon sa kapolisan sa Pinamungahan, samtang nangahoy si Balansag nakatimaho kini og grabe kaayong baho hinungdan nga iyaha kining gipangita.

Mao nalay iyang napalgan ang patay’ng lawas sa biktima nga nadugta na ug dili na mahitsura. Matud pa nga gitabunan na ang patay’ng lawas og mga laya nga dahon sa lubi.

Daling miadto si Balansag sa hepe sa mga tanod nga si Laurencio Ceniza ug gipahibalo sa iyang nakit-an. Si Ceniza na maoy mitawag sa kapolisan.

Dihang miabot ang kapolisan sa maong dapit ang kapuyo niini nga si Lucrecio Waban, 28, mao nay miila sa biktima. Atol sa pagsukit sukit sa kapulisan kang Waban mitug-an kini nga katapusan nilang nakit-an si Mainit niadtong Oktubre 11. Matud pa niini nga dunay deperensiya sa panghuna-huna si Mainit ug molakaw kini sa balay nga dili mananghid.

Gidala sa punerarya sa lungsod ang patay’ng lawas ug tungod kay nadugta na ug dili na mahitsura gipalubong nalang kini nga wala na mapailawom sa autopsiya.

Nagduda ang pipila ka mga polis nga posibleng gipasipad-an ang biktima una pa gipatay apan hangtud nga walay makuhang ebidensyang magsuporta sa ilang pagduda dili sila makahimo og dugang lakang batok sa mga posibleng suspek.

Lakip sa ilang gikatingala mao ang kadugay sa pagpahibalo sa kapuyo niini nga kini na-missing sukad pa niadtong Lunes ug diha nalang kini mitumaw nga patay na ang maong babaye. – BANAT NEWS