Budget sa LTO pugngan ni Gullas

CEBU, Philippines - Ang budget sa Department of Transportation and Communications (DOTC) i-defer ni Kongresista Eduardo Gullas sa unang distrito sa probinsiya sa Sugbo sa plenary session sa Kongreso karong sunod semana kay wala tumana niini ang kamandoan sa kanhi kalihim sa maong ahensya.

Gipasabot ni Gullas nga napakyas sa pagtuman ang Land Transportation Office (LTO) sa kamandoan ni kanhi DOTC Secretary Leandro Mendoza sa pagpabalhin ning maong buhatan gikan sa South Central Square sa barangay Lawaan III balik ngadto sa city hall sa barangay Mohon.

“I will move to defer the approval when the budget of DOTC will be on board on the 14th (Oktobre) for the reason that despite the order of former Secretary Leandro Mendoza to move back the LTO to the Talisay City hall from the South Central Square, until now it’s still there”, matud pa ni Gullas.

Matud sa Kongresista nga sukad pa sa sinugdanan kanunay na niyang gipahinumdom ang kabahin sa pagpabalhin sa buhatan sa LTO ngadto sa South Central Square tungod kay disadvantageous kini sa mga kliyente ug sa gobiyerno.

Ang nahisgutang extension nga buhatan sa LTO gikan sa city hall gibalhin ngadto sa South Central Square niadtong Nobiyemre, 2008.

Ubos sa memorandum of agreement (MOA) tali ni Mateo Velasco sa Matvel Holdings Corp. kinsa tag-iya sa nahisgutang pribadong building nga giukopahan karon sa LTO , gihatag kining libre alang sa maong ahensya ubos sa kontrata nga 25 ka tuig.

Ang maong MOA gilagdaan niadtong Mayo 14, 2007 ni Velasco ug ni LTO Director Alex Leyson.

Matud ni Gullas nga tinuod walay abang sa building apan ang LTO magbayad sa maintenance sa kuryente, tubig ug komunikasyon samtang diha sa city hall libre kini sa tanan.

Samtang ang parking area alang sa mga kliyente lapad kaayo itandi diha sa South Central Square.

Gibutyag usab ni Gullas nga ang tanang transaksiyon sa LTO sama sa drug testing ngadto na sa smoke-emission testing nasipong ang tanan ni Velasco.

Si Gullas midugang nga hangtod nga walay kasigurohan ang pagbalik sa LTO diha sa city hall padayon siya sa iyang plano sa pagpugong sa budget sa DOTC.  (BANAT NEWS)