CEBU, Philippines - Nasagmuyo si kanhi Cebu City mayor ug karon south district Kong. Tomas Osmeña sa gihulagway niyang overpricing sa military budget atol sa mga budget hearings nga iyang gitambungan isip vice chairman sa committee on appropriations sa Kongreso sumala pa sa interbyu kaniya sa sibayaanang DyRC kagahapon.
Si Osmeña miingon nga mosumitir unya siya og opisyal nga resignation ngadto sa komitiba gumikan kay dili niya madawat ang grabeng pagpaburot sa mga presyo.
Gihimong sanglitanan ni Osmeña ang presyo sa usa ka .50 caliber sniper rifle nga balor og P3.8 milyones nga giingong mopalit og 60 ka buok apan alang kaniya mahal ra kaayo, matud pa niini nga dili niya kini madepensahan sa hearing.
Gawas pa niini mao ang uban pang mga nakita niyang mga dili niya maesplikar nga mga budget appropriations sa militar.
Sumala niya nga wala na siya ganahing motambong sa mga budget hearings gumikan kay dili usab siya paminawon sa ubang miyembro ingon man sa Department of Budget Management (DBM) nga maoy mopagawas sa pundo.
Matud pa sa mayor pipila ka adlaw gikan karon hayan iyahang isumitir ang iyang resignation letter apan sa pagkakaron wala na siya’y tungha-tungha sa mga hearings agi og pagpakita og walay interes sa maong posisyon isip vice chairman. – BANAT NEWS