Drayber misuway'g suborno gipriso

CEBU, Philippines - Gidakop ug gipasakaan og kaso ang usa ka drayber sa habal-habal tungod sa pagsuway og panuborno niini ngadto sa mga polis nga misikop kaniya sa usa ka checkpoint didto sa Purok Caimito, barangay Sangi siyudad sa Toledo sa miaging gabii.

Ang nadakpan ug nagtingkagol na karon sa karsel mao si Rodrigo Lausa Adolfo, 30, minyo, nga taga barangay Lagtang siyudad sa Talisay.

Si SPO4 Gil Lastimosa sa Toledo City Police mibutyag sa Banat News nga nadakpan nila ang suspetsado samtang nag- checkpoint sila ug mga kaubanang polis nga gipangulohan ni Chief Insp. Jovito Canlapan didto sa Purok Caimito.

Matud pa ni Lastimosa, nga dihang nahiagi sa checkpoint si Adolfo ila kining gipara ug   gisukit-sukit, apan napakyas kini pagpakita sa rehistro ug lisensya niya hinungdan nga ila kining gidakop.

Apan matud pa mitunol kini og P60 ngadto kang Chief Insp. Canlapan hinungdan nga gidala siya ngadto sa buhatan sa kapolisan ug gibalhog sa prisohan.

Gihimong ebidensya sa mga otoridad ang tulo ka tag P20 salapi nga buot unta niyang isuborno ngadto sa mga polis.

Kagahapong adlawa gipasaka na ang kasong kalapasan sa Article 212 sa revised penal code batok kang Adolfo. – BANAT NEWS