Gidunggab sa wa ilhing kainom angol

CEBU, Philippines - Samaran ang usa ka lalaki human kini dunggaba sa iyang wala hilhing ka-inom didto sa Upper Calajuan, lungsod sa Minglanilla sa miaging kaadlawon.

Ang biktima nailhan nga si Ronald Aliganga, 23, nga taga Poblacion Ward 4, sa maong lungsod.

Sa pakighinabi sa Banat News ni PO2 Avelino Selloria sa Minglanilla Police Station, kini mibutyag nga ang ilang buhatan nakadawat og tawag gikan sa usa ka concerned citizen kalabot sa insidenti sa pagpanunggab.

Tungod niini daling mirespondi ang kapolisan ug didto ilang naabtan ang nagkadugo nga biktima.

Base sa nakuha nga inisyal nga imbestigasyon sa kapolisan nasayran nga ang biktima ug ang usa ka kainom niyang wala hiilhi nagkalingaw og inom sa gawas nga bahin sa usa ka diskohan.

Tunga-tunga sa ilang panag-inom, ang wala hiilhing criminal kalit lang milanit sa iyang kutsilyo ug gihansak ngadto sa nagkalainlaing bahin sa lawas sa biktima gikan sa buko-buko, liog ug sa walang bukton.

Matud pa ni Selloria nga sa pagkakaron ila pang gisubay ang hinungdan sa maong pagpanunggab ug sayron kun wala ba kini kanhing panagbangi nga miresulta sa pagpanunggab.

Midugang si Selloria nga posible usab nga tungod lang sa kahubog ug nagkabinayloay og init nga estorya ang mamumuno ug ang biktima hinungdan sa maong pagpanunggab

Ang biktima didto ihatod sa Vicente Sotto Memorial Medical Center asa dakbayan sa Sugbo samtang ang kriminal gipangita pa sa kapolisan human kini mosibat. - Lesley Caminade (BANAT NEWS)