Negosyante Gipatay Sud Sa Iyang Tindahan

CEBU, Philippines - Usa ka negosyante ang gipatay sulod sa iyang tindahan ug gituohang gisuwayan kini pagtulis sa nag-inusarang wala mailhing lalaki kagahapon sa udto diha sa Highway Tagunol sa barangay Basak-San Nicolas ning dakbayan.

Si SPO2 Roger Nedamo sa Homicide Section sa pakighinabi sa Banat News miila sa biktima mao si Ernesto Ricablanca, 43, nanag-iya og tindahang sari-sari store sa maong dapit nakaangkon og samad dinunggaban sa walang dughan.

Matud pa ni Nedamo, base sa gibutyag sa maguwang sa biktima nga si Santiago nag-inusara ra ang biktima nga nagbantay sa tindahan niini diha sa silong samtang siya nagpreparar og ilang paniudto.

Mao nalay nadunggan niini nga misinggit ang biktima nga nagpakitabang hinungdan nga dali siyang mikanaog ug mao nalay iyang naabtang nagsapupo kini sa dughan ug miingong “gidunggab ko noy.”

Si Santiago daling milili sa gawas sa tindahan ug nakit-an pa niini ang gidudahang tulisan nga nagdali padulong sa direksyon sa sitio Ubos-Poso sa samang barangay apan naglisod siya sa pag-ila gumikan kay wala gyud kini molingi.

Tungod niini daling gitabang ni Santiago ang biktima ug gidala sa Cebu City Medical Center apan matud pang Nedamo dangtan ang pipila ka minutos nakabsan kini sa kinabuhi.

Base sa ilang gihimong imbestigasyon sa tindahan sa biktima nagkaguliyang na ang mga paninda niini nga gihulagway ni Nedamo nga misukol ang biktima.

“Mura’g tulis siguro ni, gidunggab. Mura man og misukol ni kay naa may sign of struggle,” matud pang Nedamo. Nasuta usab base sa ilang pagsukit-sukit sa mga silingan sa biktima nga hilumon ug maayong tawo kini ug walay nakontra sa ilang dapit.

Nakuha diha sa crime scene ang dose pulgadas nga kitchen knife nga giingong maoy gigamit sa tulisan.

Ang Homicide Section nakig-alayon na karon sa Theft and Robbery Section alang sa pagkasikop sa tulisan. - Edwin Ian Melecio (BANAT NEWS)