Baha sa tunghaan gireklamo

CEBU, Philippines - Mga residente sa barangay Tunghaan, lungsod sa Minglanilla nahasol pag-ayo nunot niining pag-ulan-ulan tungod kay malubog na usab sa tubig-baha ang maong lugar.

Si PO3 Eric Enad nga nadestino sa Talisay City Police Station ug residente sa lugar nga nahinabi sa Banat News mibutyag nga sobra na sa 10 ka tuig giantos nila ang maong problema apan hangtod karon wala gihapon kini masulbad.

Matud ni Enad nga napaabot na sa engineering’s office sa lungsod ang suliran ug gani migawas na sa balita sa TV ug hangtod karon naghulat pa sila sa himuong aksiyon sa kadagkoan sa Minglanilla.

Gihulagway ni Enad nga diha sa highway sa ilang dapit dili na makita ang karsada tungod kay ang baha moabot kutob sa hawak ug usahay motubo pa kutob sa liog sa tawo kun kusog ang ulan.

Gibutyag ni Enad nga sa maong dapit nahimutang ang BD Learning Center ug delikado kaayo sa mga bata nga tinun-an sa maong tunghaan kun maanod sa baha.

Delikado usab sa mga motorista nga moagi sa highway atol sa baha ilabi na kadtong magmotorsiklo tungod kay kuyaw kun madakin-as ug malamba ug mahulog sa lungag.

Ang Banat News mitawag sa buhatan ni Municipal Engineer Nestor Sotes sa Minglanilla apan ang iyang staff nga si Kit Rubillos nagkanayon nga ubos pa sa suspension si Sotes ug mapupos ang iyang suspension order sa buwan sa Nobiyembre ning tuiga.  - BANAT NEWS