CEBU, Philippines - Makigtagbo si Mayor Michael Rama sa kadagkoan sa College of Law sa University of San Jose-Recoletos aron mahimoan og dinaliang aksiyon ang pagkalambigit sa ngalan sa usa nila ka tinun-an nga si Jed Carlos Lazaga sa bag-ohay lang nga kagubot sa Taft Avenue, duol sa De La Salle University diin gihimo ang bar exam nga mibilin og 47 ka tawo nga naangol.
Giingong usa ka sakop sa Alpha Kappa Rho si Lazaga ug kasamtangang fourth year law student sa USJR.
Matud pa sa mayor nga nakurat siya nga adunay Sugboanon nga nalambigit sa insidente. Apan iyang giklaro nga dili siya kumbinsido niini sanglit nakadungog siya og mga estorya nga dili lang kay Akrho ug Tau Gamma Phi ang fraternity nga nag-estambay sa Taft Avenue atol sa pagbuto sa granada.
“Sa akong nahibaw-an malinawon man ang Akrho ug Tau Gamma sa Manila, dili sama kagubot dinhi sa Cebu, duna ko’y nadunggan nga duna pa gyu’y laing grupo sa fraternity ang nakadala og gubot didto,” matud ni Rama.
Gitataw ni Rama nga ang kahuyang sa puwersa sa kapolisan sa maong dapit ang angayan nga basolon.
“Didto gyud ko sa nahitaboan kay naa man ni-take man pud sa exam akong anak nga si Mikel. Gamay ra kaayo ang nakit-an nako nga polis,” dugang pa sa mayor.
Nasaksihan usab sa mayor nga daghan kaayo ang nag-inom gawas sa De La Salle University ug wala gyud mabadlong sa kapolisan. - BANAT NEWS