CEBU, Philippines - Nagtingkagol sa Talisay City detention cell ang bata-bata ni Joavan Fernandez human gi-atake ug gituok ang usa ka polis nga misita kaniya tungod kay walay plaka ang motorsiklo nga iyang gimaneho niadtong Sabado sa gabii sa Vista Grande Subdivision, barangay Bulacao, dakbayan sa Talisay.
Ang suspetsado mao si Mac Mewel Sabihon, 27, taga barangay Lawaan I, dakbayan sa Talisay.
Kahinumduman nga si Sabihon niadtong milabay’ng mga adlaw mipasangil kang Supt. Henry Biñas, hepe sa Talisay City Police Station nga mi-harass ug mikapkap kaniya hinungdan nga ang hepe iyang gipa-blotter.
Si Biñas nga nahinabi sa Banat News kagahapon mibutyag nga aduna sila’y nadawat nga report sa usa sa mga residente sa lugar nga nahitaboan nga si Joavan giingong migamit og wang-wang.
Matud ni Biñas nga ang maong residente mipasangil kang Joavan nga gipatingugan siya og wang-wang samtang nagbiyahe paingon mogawas sa subdivision ug wala pa matagbaw, ang sinagop sa mayor mi-overtake pa gyud kaniya diha sa karsada.
Sila si PO3 Mikie Espina, PO2 Stephen Sefuesca ug PO1 Rosauro Pasumala maoy gipasusi ni Supt. Biñas ngadto sa lugar pagsuta sa maong report.
Kahinumduman nga ang opisyal sa Department of Interior and Local Government (DILG) miawhag sa kapolisan ilabi na ngadto kang Supt. Biñas nga ipasusi ang paggamit ni Joavan og wang-wang.
Sa pamunoan karon ni Presidente Noynoy Aquino higpit nga gidili ang paggamit og wang-wang aron madali sa ilang mga biyahe gawas lang sa mga polis ug uban pang ahensiyang hingtungdan kun duna kini mga operasyon nga pagahimoon.
Apan sa pagsusi nilang PO3 Espina, PO2 Sefuesca ug PO1 Rosauro, si Sabihon ang ilang nakit-an nga nagsakay og motorsiklo nga walay plaka paingon nang mogawas sa subdivision.
Si PO1 Pasumala maoy mipahunong kang Sabihon aron sitahon unta kini kabahin sa nahimo niyang kalapasan sa trapiko.
Si Sabihon giingong nanaog ug gitukmod ang motorsiklo dayong kawhat ngadto sa liog sa polis.
Sila si PO3 Espina ug PO2 Sefuesca daling mitabang kang Pasumala sa dihang ilang nakita nga gigunitan na sa suspetsado ang liog niini.
Si Sabihon giingong midagan palayo sa tulo ka mga polis apan nasakpan kini.
Nasuta usab sa mga polis nga si Sabihon wala’y driver’s licence nga nagmaneho ug ang motorsiklo walay rehistro, walay side mirror ug cannibalize pa ang maong sakyanan.
Si Sabihon gikatakdang pasakaan og kasong pagpangatake ug pagsupaksupak sa polis ug manubag usab kini sa iyang nahimong kalapasan sa trapiko. (BANATNEWS)