CEBU, Philippines - Tulo ka mga lalaking armado nadakpan sa kapolisan sa Minglanilla atol sa check point sa national highway sa maong lungsod sa miaging gabii .
Ang mga suspetsado mao sila si Alfie Vallasca Peteros, 29; Vergon Geonzon Ricablanca, 29; ug Richard Caballero Gasataya, 23, pulos ulitawo nga taga Poblacion Ward 2 , sa Minglanilla.
Si Peteros ug Ricablanca pulos nasakmitan og tagsa ka .45 kalibreng pistola uban sa mga buhing bala sa magazine niini, samtang si Gasataya, nakuhaan lang og lima ka buhing bala sa kalibre .45 nga pistola.
Sumala sa kapolisan nga buot untang molikay ang maong mga suspetsado gikan sa check point, apan dihang nasabtan nilang dili sila makaipsot gikan sa kapolisan, mihunong sila hinungdan nga nasikop ang dala nilang mga armas de fuego.
Sa pagkakaron nagtingkagol na sila sa prisohan sa kapolisan sa lungsod. (BANAT NEWS)