Mike di uyon estriktohon 10-anyos di pasakyon motor

CEBU, Philippines - Dili uyon si Mayor Michael Rama sa tinguha sa Philippine National Police pag-estrikto sa pagpatuman sa Helmet Law nga did-an ang mga batang ubos sa 10-anyos nga makasakay og motorsiklo.

Kahinumduman nga gimandoan ang tanang police units sa higpit nga pagpatuman sa Akta Republika 10054 ug ang pagdili na sa pagpaangkas og batang ubos sa 10-anyos.

Nagkanayon si Rama nga kinahanglan nga i-review kini sa kapolisan sanglit ang motorsiklo ra ang dali nga mapalit sa mga tawo aron magamit sa mga dinaliang lakaw.

Dugang pa sa mayor nga ang importante mao ang paggamit sa helmet ug responsibilidad na kini sa mga tawo nga mogamit niini matag sakay nila og motorsiklo.

Nasayran nga uso karon ang habal-habal isip nag-unang transportasyon sa kabukiran ug adunay mga bata nga dala sa mga dagko nga pasahero niini.

“Lain sad kaayo paminawon nga ang ginikanan kay magsakay unya ang anak kay maglakaw ra. Dili baya ta basta-basta makapalit auto,” sumala pa ni Rama.

Giawhag hinuon ni Rama ang publiko nga mogamit kanunay og helmet aron malikay sa dakong kadaot kun madisgrasya.

Andam hinuon makigtigom ang mayor kang Cebu City Police Office Chief Sr. Supt. Melvin Buenafe aron hisgutan ang posibleng solusyon sa nahisgutan nga sitwasyon.

Giingong dunay ubang motorista ang dili kaayo mogamit og helmet ilabi na kun mabantayan niini nga walay traffic enforcers sa kadalanan.

Base sa Akta Republika 7610, gidili ang pagpasakay og mga bata sa motorsiklo sanglit naghatag kini og peligro kanila. (BANATNEWS)