Bag-ong DYRC mabati na usab sa Sept. 21

CEBU, Philippines - Pinaagi sa modernong teknolohiya sa pagpanibya ug serbisyo publiko ilabi na sa news and public affairs maoy gilauman sa kadagkoan sa subling mobukas nga DyRC radio station nga magsugod pagsibya karong Septiyembre 21 ning tuiga.

Ang DyRC sa Mindanao Broadcasting Corporation mosibya sa kusog nga 10 watts sa am frequency nga 648 kilohertz sa subli nilang pagbalik sa kahanginan sukad nga nahunong onse na ka tuig ang nakalabay.

Ang DyRC nagsugod panibya sa Sugbu niadtong 1939, usa ka tuig human mosibya ang nabantog na karong mother station niini nga DzRH sa kaulohan.

Matud pa ni Juniño Padilla mopokus sila sa news and public affairs ug mga programang pagtinguhang makatabang sa mga kabus ug sa publiko sa kinatibuk-an aduna say pipila ka programang may kalambigitan sa relihiyosong kalihukan.

Sumala pa niini nga maong subling gibuhi ang DyRC nga kaniadto mao ang Aksyon Radyo gumikan kay dili na kini bag-o pa sa publiko sanglit ‘legendary’ na kini sama sa DzRH.

Ang unang madungog nga anchorman atol sa pagbukas niini karong Septiyembre 22 diin madungog gyud ang regular programs mao ang naila nang kolumnista sa Banat News nga si Inday Misyel kinsa maoy mopukaw sa mga tigpaminaw.

Mosunod dayon niini ang programang ‘Balita Numero Uno’ nga dad-on nila ni Roel Cabañero ug Banilad barangay kapitan Malou Tabar.

Magsugod ang sibya sa DyRC alas-4 sa kaadlawon ug motak-op alas-11 sa gabii.

Gipaabot usab nga makigpares ang Department of Social Welfare alang sa programang ‘Dangpanan’ nga ilusad alang sa pagtabang sa mga kabus.

Si Juniño wala mahulga sa modernong matang sa media karon nga migamit na og telebisyon ug internet tungod kay aduna pa gihapoy mga dapit nga walay access ang mga tawo niini.

“As long as may maminaw ug radyo, dili pa ni mawala,” matud pa niini. Ang DyRC mahimo gihapong mapaminaw ug makita sa internet pinaagi sa audio-video streaming.

Ang DyRC nga dumalaon ni Ramil Paican isip operations manager mao pay labing unang sibyaanan sa nasud nga mogamit og digitalized radio broadcasting.

Si Ricky Poca nga usa sa mohawid og mga programa nagkanayon nga mga kasaligang tigbalita sa Sugbu nga gilangkuban sa mga beterano ug mga batan-on ang naglangkob sa news and public affairs niini.

Giklaro hinuon ni Juniño nga walay dawatong political blocktimers sa maong sibyaanan aron dili maduhig ang ilang pangalan.

Nanawagan si Juniño sa mga kakompetensya unya sa kahanginan nga hatagan usab sila og higayon nga makatampo sa pagpanibya ug makasalmot sa mga isyung may kalambigitan sa kaayohan sa publiko. (BANATNEWS)