CEBU, Philippines - Gisuportahan ni Kongresista Gabriel Luis “Luigi” Quisumbing ang tinguha sa kagamhanang nasyonal nga mapalapdan ang mga ospital sa Sugbo tungod sa nagkataas nga populasyon.
Si Quisumbing uyon nga palapdan ang Vicente Sotto Memorial Medical Center (VSMMC) aron makadawat og daghang pasyente.
Laing laraw ni Quisumbing ang pagpalapad sa Mandaue District Hospital, Eversley Child Sanitarium Hospital ug magtukod og ospital sa Cordova.
Iyang gitataw nga mga prayoridad sa iyang pagkakongresista mao ang panglawas ug dili siya makaako pagtan-aw sa mga kabus nga mga pasyente nga dili matarong pag-atiman sa mga pampublikong ospital tungod sa kapuno sa mga pasyente.
Apan gitataw ni Quisumbing nga iyang matampo sa pagkakaron mao lamang ang paggahin sa iyang Priority Development Assistance Fund (PDAF) nga moabot og P70 milyones matag tuig, apan moduol siya sa Malacañang.
Sa iyang bahin, si VSMMC medical director Gerardo Aquino mapasalamaton sa suporta ni Quisumbing, ilabi na nga naapil og endosar sa kongresista pagtukod og Lung Cancer Center sa Sugbo. - BANAT NEWS