Bata-bata ni Joavan giharas sa polis

CEBU, Philippines - Usa ka bata-bata ni Joavan Fernandez mireklamo kagahapon nga matud pa giharas siya ni Police Supt. Henry Biñas, ang hepe sa Talisay City Police Station.

Si Mac Mewel Sabihon, 27, nga taga barangay Lawaan, dakbayan sa Talisay miadto sa buhatan sa kapolisan sa barangay Poblacion sa dakbayan ug mipa-blotter nga matud pa gihasi ug gikomprontasi siya ni Biñas ug gikapkapan ang lawas sa walay igong katarungan.

Gibutyag ni Sabihon nga didto siya hasia sa hepe sa kapolisan sa Talisay sa duol sa Balay Alampoanan ni Mayor Socrates Fernandez   sa ibabaw’ng bahin sa Santa Lucia Subdivision sa barangay Bulacao sa maong dakbayan.

Ang nahitabo kang Sabihon gidasonan usab ni Joavan kinsa mibutyag sa Banat News kagahapon ug mipasangil usab kang Biñas nga mirikisa kini kang Sabihon nga ingon nga nangita gyud og armas gikan sa lawas sa naulahi ug nangita usab kaniya (Joavan).

Maoy hinungdan , matud pa ni Joavan nga iyang gimandoan si Sabihon sa pagpa-blotter sa gibuhat   sa hepe kaniya.

Sa samang higayon gihagit ni Joavan si Biñas pinaagi sa pag-ingon “ako siyang gihagit nga kung tinuoray siyang isog mosulti siya sa tinuod ug makigharong siya kanako”, matud pa ni Joavan.

Gikuwestiyon ni Joavan nganong nahiabot si Biñas ngadto sa Santa Lucia, ug midugang nga dihang miadto ang iyang amahan nga si Mayor Socrates Fernandez sa Talisay City Police Station, wala moatubang ang hepe kay mitago kuno kini.

Apan si Biñas dihang gipangutana sa Banat News bahin sa pasangil nga mitago siya, miingon nga walay mayor nga mipatim-aw didto sa iyang opisina kay igo lang kining mitawag sa telepono ug gani malipay kaayo siya kung makigharong si Mayor Fernandez kaniya, matud pa ni Biñas.

Bahin sa pagpa-blotter ni Sabihon, si Biñas nagkanayon nga katungod kana niyang magpa-blotter bisan punoon pa niya og suwat ang blotter,matud pa sa hepe sa kapolisan sa Talisay.

Midugang siya nga igo lamang siyang mituman sa iyang katungdahan isip tigpatunhay sa kalinaw ug kahusay sa dakbayan.

Bahin sa pangutana ni Joavan, nganong miadto si Biñas sa Santa Lucia, ang hepe sa kapolisan sa Talisay miingon nga miadto siya tungod sa nadawat nilang reklamo kalabot sa giingong mga tawo nga nagtapok didto nga banha ug langas kaayo nga nakahasol sa mga molupyo sa maong lugar.

Matud pa niya nga pag-abot nila sa duol sa balay alampoanan, ang pundok sa mga nag-inom nabungkag kay mikaratel kini og panagan pagkamatngon nilang may sakyanan sa polis nga naabot.

Si Sabihon nga wala modagan nangatarungan nga nangita kini og kaka, dihang iya kining gisita, matud pa ni Biñas.

Midugang siya nga wala siya makakita kang Joavan didto apan ang sakyanang Big Horn, Pajero, ug Honda Civic didto iparking sa kilid sa balay alampoanan.

Miingon si Biñas nga dili na siya mohatag pa og dugang pamahayag kay mas daghan pa siyang atimanong mga butang nga alang sa kaayohan sa katawhan sa Talisay.

Sa laing bahin mibahad ang Department of Interior and Local Government nga susihon usab niini ang gikatahong paggamit ni Joavan og wangwang sa iyang sakyanan.  - Brenda D. Batuto ug Lesley Caminade ug Chester Abadilla (BANAT NEWS)