Iro, dili fetus ang pabenditahan

CEBU, Philippines - Iro diay ang napalgan sa mga residente sa barangay Punta Engaño, dakbayan sa Lapulapu kagahapon sa buntag apan gikagubtan kay nagtuo ang mga tawo nga usa ka fetus nga dad-on unta ngadto sa simbahan aron pabendisyonan.

Matud pa ni SPO2 Rolito Jumao-as nga mga alas 6 kagahapon sa buntag nagkagubot ang mga residente sa maong dapit sa ilang nakit-an sa luyo sa usa ka balay kay nagkadugo.

Sa pagresponde sa kapolisan, usa ka “May Ann” ang mipadayag sa kapolisan nga aduna siya’y nabati nga panaglalis tali sa usa ka babaye ug lalaki sa dapit diin napalgan ang lawas nga gituohan nilang fetus.

Gumikan niini, wala mikompirmar ang kapolisan nga usa ka fetus ang napalgan sa mga residente sa maong dapit.

Gidala kini sa kapolisan sa Lapulapu City Hospital alang sa konpirmasyon, apan nasota sa mga doktor nga usa kini ka iro gumikan sa gamay’ng ikog niini. - BANAT NEWS