Mipatay kang Satur gipangita

CEBU, Philippines - Nagpabilin pang tanghaga sa taga barangay Cansaga sa lungsod sa Consolacion kun si kinsay mipatay kang Saturnino Pepito Jr., kinsa nagbuy-od nga wala nay kinabuhi kansang lawas nabulit sa dinunggaban didto sa Cansaga sa miaging gabii.

Kini ang nasayran sa Banat News kang PO2 Jeovani Mabano kinsa nagkanayon nga sa kasamtangan padayon pa nilang giimbestigar ang maong hitabo pamasin nga makahipos sila og mga kasayoran nga makahatag og sulbad sa kamatayon ni Pepito.

Matud pa ni PO2 Mabano nga ang biktima gikan pa nga nakig-inom sa iyang mga higala sa nahisgotang dapit ug mibiya kini sa mga kauban human makapananghid nga mopauli sa ilang balay.

Dugang pa niya nga pipila ka gutlo ang nakalabay, ang usa sa mga gikainom sa biktima nga si Desiderio Capangpangan maoy nakamatikod sa biktima nga nagbuy-od kini sa daplin sa karsada nga nagkadugo na ang kalawasan.

Nangayo og panabang si Capangpangan sa ilang mga silingan sa maong lugar ug gihatod dayon ngadto sa tambalanan ang biktima diin gideklarar kini sa mga doktor nga dead on arrival.

Wala usab hisayri sa kapolisan kun si kinsa ang kontra sa biktima o kaha gipareglahan lang kini og tuyo.  (BANATNEWS)