Midasmag sa dumptruck namatay

CEBU, Philippines - Namatay dihadiha ang usa ka lalaki human kini modasmag usa ka mini-dump truck nga iya sa kagamhanan sa lungsod sa Dalaguete ug misaliring kini hangtod nga misungag sa railing sa karsada  didto sa barangay Candabong, lungsod sa Argao sa miaging gabii.

Ang biktima nailhan nga si Samuel Parantar, 39, nga taga barangay Binlod sa maong lungsod.

Sa pakighinabi sa Banat News ni PO2 Bernie Lao sa Argao Police Station kagahapon, siya mibutyag nga ang biktima paatubang na unta nga muoli sa ilang balay sakay sa iyang motorsiklo nga Honda TMX-155 nga adunay plate number GN-1947.

Apan sa pag-abot niya sa maong lugar gikatagbo niini ang mini-dumptruck nga gimaniho ni Florentino Idias nga may plate number nga SJF-360 nga nagpaingon sa lungsod sa Dalaguete aron magkuha sa mga sundalo.

Apan malagmit nakalitan pagyatak ang preno, giingong kalit lang mibaliwliw ang dagan sa motorsiklo sa biktima hangtod nga nabangga kini sa walang bahin sa dump truck.

Gumikan niini misaliring ang motorsiklo sa biktima ngadto sa railing sa dalan ug maayong pagkapantok sa iyang bagolbagol sa puthaw nga koral.

Diha-diha daling gihatod ang biktima ngadto sa Isidro Kintanar Memorial Hospital apan gibalhin kini sa usa sa mga hospital sa syduad sa Sugbo diin didto ideklarar nga patay na kini sa paghiabot.

Samtang si PO1 Arnold Frenal sa Argao Police Station mibutyag usab sa Banat News nga base sa ilang nakuha nga impormasyon nasayran nga ang biktima gikan nga namiyesta sa barangay Candabong ug nag-inom kini uban sa iyang higala.

Gani giingong gipugngan pa kini sa iyang mga higala nga dili una papauli-on apan wala kini nanumbaling ug mi-uli gyud.

Sa pagkakaron kasamtangang natanggong ang drayber sa dumptruck sa Argao Police Station samtang mopahigayon pa og imbestigasyon ang kapolisan bahin sa maong hitabo. (BANATNEWS)