Nakig-date sa uyab giluba patay sa manguhaay'g kaka

CEBU, Philippines - Patay ang usa ka 19-anyos nga lalaking nakig-date sa iyang uyab diha sa usa ka bakanteng luna sa barangay Catarman sa lungsod sa Liloan human gitabangan og dunggab sa wala mailhing mga lalaking nanguha og kaka kagahapon sa kaadlawon.

Si SPO4 Terso Lima sa Liloan police station sa pakighinabi sa Banat News miila sa biktima mao si Aldin Jugalbot Byasa, residente sa sitio Dapdap sa lungsod sa Liloan.

Matud pa ni Lima nakaangkon og daghang samad sa nagkadaiyang bahin sa iyang lawas si Byasa nga maoy nakaingon sa iyang hinanaling kamatayon.

Si Lima mibutyag base sa gihimong imbestigasyon ni SPO2 Marcelino Servilla nga ala-una pasado palang sa kaadlawon kagahapon dihang ang biktima ug uyab niining naila lang sa pangalan nga “Krisa” ang giingong nag-estoryahay sa usa ka bakanteng lote sa maong dapit.

Taud-taod miabot ang duha ka wala mailhing lalaking nagdala og flashlights nga giingong nanguha og kaka hinungdan nga gipahibalo dayon sa uyab niini ang biktima kabahin sa maong duha ka lalaki. Giingong diha-diha nahitabo ang panaglalis tali sa biktima ug sa maong duha ka lalaki kinsa dali usab nga milakaw apan dangtan pila ka gutlo mibalik kuyog na ang laing duha pa ka mga lalaki.

Sumala pa ni Lima ang usa sa mga gikatahapan nga nagsuot og puti nga t-shirt daling mihagit sa biktima sa pag-ingon “unsay gusto nimo pinatyanay?”

Tungod niini nahitabo ang panagdumog tali sa mga gikatahapan ug sa biktima ug kalit lang nalup-og ang biktima gumikan sa kadaghan sa mga samad dinunggaban sa kalawasan niini ug nakabsan sa iyang kinabuhi.

Ang kapolisan sa Liloan padayon pang miila sa mga responsable sa maong krimen. (BANATNEWS)