Bakanteng lote gibaha gikabalaka sa taga-Pooc

CEBU, Philippines - Mga molupyo sa sitio Ranger, barangay Pooc, dakbayan sa Talisay nabalaka nga mabiktima sa dengue tungod sa nagpundong tubig sa usa ka pribadong bakanteng lote nga gibanabanang dunay gilapdon sa duha ngadto sa lima ka ektarya.

Gikataho nga ang maong tubig uwan nga tin-aw nagpundo sa lote sukad pa niadtong Hunyo ning tuiga sa dihang nagsugod ang pagbundak sa ulan human sa El Niño.

Ang maong bakanteng lote wala kini koral ug walay maagian sa tubig nga gihulagway nga sama sa swimming pool.

Si Konsehal Bernard Odilao, chairman sa Committee on Environment sa konseho sa dakbayan sa Talisay kagahapon nagkanayon nga makig-ayuda siya kang Konsehal Choy Aznar, chairman sa Committee on Health aron ilang bisitahon ang maong lugar.

Matud niini nga nagkinahanglan sila og tabang sa city engineering alang sa water pump nga makasuyop sa tubig nga nagpundo ug sa kabomberohan sa siyudad nga maoy mohakot sa tubig aron mahuwad ngadto sa sapa.

Si Odilao nagkanayon usab nga gawas sa sitio Ranger i-monitor usab nila ang ubang lugar sa siyudad diin posibleng dunay mga tubig-ulan nga nagpundo nga ma-itlogan sa mga lamok nga nagdala sa virus nga makamugna og dengue fever.

Si Odilao midugang nga ang siyudad migahin og pundo alang sa mga nabiktima sa dengue. – BANAT NEWS