Gun ban ipatuman sa barangay election

CEBU, Philippines - Nagtagbo kagahapon ang Commission on Elections (Comelec) ug tinugyanan sa kapolisan ug militar alang sa pormal nga pagpatuman sa gun ban nunot niining nagsingabot nga barangay ug SK election sa Oktubre 25.

Si Cebu Comelec Provincial Supervisor Lionel Marco Castillano nakigtagbo kagahapon kang Cebu Provincial Police Office Sr. Supt. Erson Digal ug sa bag-ong commanding officer sa 78th Infantry Battalion nga si Lt. Col. Nolasco Mempin.

Matud ni Castillano nga tuyo nila nga matuki ang higpit nga pagpatuman sa gun ban sugod karong Septiyembre 25 gumikan sa nagsingabot nga piniliay.

Mo-epekto ang gun ban hangtod sa Nobiyembre 15.

Matud ni Castillano nga tuyo gyud nila nga mapahigayon ang hapsay ug malinawon nga piniliay sa barangay.

Giangkon hinuon ni Castillano nga sa pagkakaron, andam na sila sa pagpahigayon sa nahisgutang piniliay bisan pa man sa napanglantawan nila nga pagkuwang sa mga magtutudlo nga maoy maglangkob isip chairman sa board of election inspectors.

Kini tungod usab sa nadugang nga mga clustered precincts human gilimitahan lang ngadto sa sobra 300 ngadto sa 400 ka botante ang matag presinto aron dili subling masinati ang paghuot sa mga botante atol sa adlaw sa eleksyon sama sa nahitabo niadtong Mayo 10, 2010 nga labing unang automated election sa nasud diin daghan ang wala makabotar tungod sa kalangay sa proseso. – BANAT NEWS