Kapitan sa Kalunasan mokooperar sa imbestigasyon

CEBU, Philippines - Kapitan sa barangay Kalunasan nga mipadayag og kaandam nga mokooperar sa bisan unsang imbestigasyon kalabot sa pasangil sa iyang kagawad nga adunay substandard nga proyekto ang barangay.

Si Kapitan Edielito Mabano mitataw nga pamolitika ang pagbutyag ni Kagawad Nunilon Monares tungod kay modagan kini og kapitan atbang kaniya nga usa ka reelectionist.

Matud ni Mabano nga tumong ni Monares nga dauton siya gumikan kay makig-atbang man kini kaniya sa Oktubre 25 nga eleksiyon sa barangay.

Sumala pa sa kapitan nga nasayod si Monares sa ilang mga proyekto busa gikahibulong niya kun nganong nakaingon kining adunay substandard nga proyekto diha sa Kalunasan.

“Pamolitika ra gyud na iya (Monares). Huna-hunaon niya nga ang tanang projects pirme gyud na i-check sa atong mga engineers, unya moana siya nga substandard? Klaro kaayo nga pamolitika lang gyud na iya kay nangambisyon man gud nga moatbang nato karong Oktubre,” nagkanayon si Mabano.

Sa sunod nga mga adlaw, ang mga tawo gikan sa Department of Public Works and Highways (DPWH) maoy mosusi sa mga gikuwestiyon nga mga proyekto sa nagkadaiyang mga barangay.

Apan ang Konseho sa dakbayan sa Sugbo miawhag ngadto sa mga opisyal sa barangay sa paghangop sa ipahigayon nga imbestigasyon aron makalingkawas sa pasangil nga adunay mga substandard nga mga proyekto sa ilang barangay.

Pipila sa mga barangay nga mokooperar mao ang Sinsin, Tabunan, Sudlon I, Kalunasan, Pung-ol Sibugay, Sapangdaku, Bonbon ug Sudlon II. – BANAT NEWS