CEBU, Philippines - Gipahimangnuan sa kanhi undersecretary sa Dangerous Drugs Board Paul Clarence Oaminal si Mayor Michael Rama ug mga opisyal sa dakbayan sa Sugbo sa dili dayon basta-basta pagpabor sa giduso nga programa sa Department of Health pinaagi unya sa City Health Department AIDS/HIV Detection Unit.
Gitumbok ni Oaminal ang programang “syringes to drug users” nga ubos sa Harm Reduction Program nga nakalapas sa probisyon sa Comprehensive Dangerous Drugs Act of 2002 tungod kay nagtugot kini sa mga drug user nga madapatan og drugas aron lang malikay sa makamatay nga AIDS ug HIV virus.
Gipasabot ni Oaminal nga hugtanon nilang gibabagan ang pagpatuman sa maong programa dinhi sa nasud sa dihang si Sen. Vicente Sotto III mao pa ang chairman sa DDB.
Apan gikasagmuyo ni Oaminal nga gibalik kini karon pagpatuman ug gisagop sa DOH niining kasamtangang administrasiyon.
Dugang ni Oaminal nga sa Section 26 sa Akta Republika 9165, mamahimong mag-atubang og kasong kriminal kon conspiracy kadtong magpasiugda ning maong programa.
Mi-apelar ug nanghinaot si Oaminal nga dili unta magsilbing instrumento ang mga opisyal sa dakbayan paghimo og kalapasan sa balaod batok sa gidiling drugas sa higayon nga hingpit nga sagupon ang maong programa.
Hinuon masaligon si Oaminal nga si Sotto nga maoy kasamtangang majority leader ug miyembro sa Commission on Appointments mopaabot sa ilang hugot nga pagsupak ning maong pagpatuman sa programa nunot sa pagkuwestiyon ni Health Sec. Enrique Ona.
Ang Harm reduction program naggikan kini sa Scandinavian countries nga gisagop usab sa United Nations Office on Drugs and Crimes. – BANAT NEWS