Naghinlo sa atabay natagak

CEBU, Philippines - Usa ka lalakinahagbong sa karaang atabay nga iyang gilimpiyohan didto sa sitio Kaidiokan, barangay Guimbongco-an, lungsod sa Sibonga kagahapon sa hapon.

Si PO2 Ederlino Bacusmos, duty desk officer sa Sibonga Police Station miila lamang nga usa ka “Zaldy” angnahisgutang tawo.

Matud niya nga mga alas 3:00 sa hapon kagahapon nakadawat sila og tawag gikan sa igsuon sa biktima kinsa mi-report sa maong hitabo apan wala niya makuha ang ngalan sa nag-report.

Ang nahisgutang atabay dugay na nga wala magamit apan gipalimpiyohan lang kini sa tag-iya.

Si Bacusmos nagkanayon nga ang sakop sa kabomberohan sa lungsod sa Carcar ug Argao miadto sa lugar aron motabang pag-rescue sa biktima apan matud pa sa maong polis nga ang iyang mga kauban ug ang mga bombero dili makakanaog sa atabay tungod kay baho kaayo kining gasolina ug wala silay mga gas mask.

Ang biktima giingong nagdala og gasolina nga itobil sa makinang gigamit niya og limpiyo sa tabay ug gituohang nahuwad ang gasolina ngadto sa ilawom niini nga wala hisayri ang giladmon.

Hangtod ning pagbalita ang biktima wala pa mahaw-as gikan sa atabay ug ang mga polis natahap nga adunay dautang nahitabo niini tungod kay wala na kini motubag sa ilang pagsangpit.

Si Bacusmos midugang nga ang sitio Kaidiokan usa ka bukirang lugar sa Sibonga diin gibana-bana nga may tulo ngadto sa upat ka kilometro ang gilay-ongikan sa lungsod. (BANATNEWS)