Suliran sa CPPO gipadangat sa kongreso

CEBU, Philippines - Si Senior Superintendent Erson Digal, hepe sa kapolisan sa lalawigan sa Sugbo nagpasalamat kanila ni Gobernador Gwendolyn Garcia ug 6th District Congressman Luigi Quisumbing sa maayo nilang gibuhat ngadto sa kapolisan sa probinsya ug kaniya.

Matud pa ni Digal nga dako ang iyang pasalamat ni Quisumbing sa pagbisita niini sa Special Reaction Unit (SRU) sa Cebu Provincial Police Office (CPPO) aron makaabot ngadto sa kongreso ang mga kulang nga ekipo sa SRU.

Midugang si Digal nga dako ang iyang paglaom nga unta dunggon sa kongreso atol sa ilang budget hearing karong Septembre 6 ang problema sa ekipo sa kapolisan sa probinsya sa Sugbo ug kahatagan unta kini og prayoridad.

Kini aron kun may mga insidente nga motumaw nga sama sa hostage taking ug uban pa, may magamit dayon silang mga ekipo,matud ni Digal.

Samtang sa laing bahin mapasalamaton usab si Digal ngadto ni Gobernador Garcia human siya pahibaw-a niini nga siya na gayud ang mamahimong hepe sa kapolisan sa lalawigan sa Sugbo.

Matud ni Digal nga paningkamotan niyang dili mapakyas ang pagsalig sa gobernador   sa iyang kapasidad sa pagdumala sa kapolisan sa lalawigan.

Gibutyag ni Digal nga sa miaging adlaw gipatawag siya sa gobernadora kay gipakita kaniya ang rekomendasyon nga iduso sa gobernador ngadto sa Camp Crame kalabot sa iyang pagka hingpit nga provincial police director.

Gumikan niini nagkanayon si Digal nga himoon niya ang tanan aron ipakita niya sa gobernador ang iyang katakus sa pagtuman sa tahas nga gisangon kaniya .

Gani gihulman ni Digal ang panulti-on sa gobernadora nga nagkanayon nga “dili sulti ang pabuhaton kun dili buhat maoy pasultihon.”

Sa pagkakaron nagpaabot nalang usab si Digal sa tubag sa Camp Crame bahin sa rekomendasyon sa gobernador alang kaniya. – BANAT NEWS