CEBU, Philippines - Subling madungog sa kahanginan ang labing una ug inilang radio station nga DYRC (Radyo Cebu) sugod karong Septiyembre 21, 2010 atol sa ika-70th anniversary niini.
Si Juniño Padilla, station manager karon sa DYRC nga nahinabi sa Banat News kagahapon nagkanayon nga ang pagbukas sugdan sa usa ka Santos nga Misa sa alas 7:00 sa buntag ug dunay ipahigayong medical mission diha sa ilang studio sa 3rd floor Cinco Centrum, Doña Luisa Building, Fuente Osmeña, dakbayan sa Sugbo.
Matud ni Padilla nga ang DYRC maoy unang radio station sa probinsiya sa Sugbu 70 ka tuig na ang milabay sunod sa radio station nga DZRH sa Manila nga 71 ka tuig na karon.
Ang maong mga radio station ubos sa Manila Broadcasting Corporation (MBC). Gibutyag ni Padilla nga tungod sa economic reason niadtong tuig 1999 nasirad-an ang DYRC ug napulihan sa Aksiyon Radyo nga gidumala ni Carlo Duga-duga.
Si Padilla mapasigarbohong mga inilang personahe nganhi sa Sugbo sama nila ni kanhi Inday Nita Cortez Daluz, Natalio “Taleux” Bacalso ug Kongresista Antonio Cuenco naggikan kaniadto sa DYRC.
Ang mga personahe karon sa DYRC mao si Ramil Paican siya maoy operation manager karon sa nahisgutang radio station, Inday Misyel, Ricky Poca ug Roel Cabañero, Divine Marcial ug uban pa. – BANAT NEWS