Gang war sa carreta usa patay

CEBU, Philippines - Patay diha-diha ang usa ka menor de edad kini human napusilan sa usa ka gituohang sakop sa Bloods Gang pasado alas-3 sa hapon kagahapon diha sa dalan MJ Cuenco sa barangay Carreta ning dakbayan. Ang biktima nga nagpangidaron og 17-anyos (pangalan gipugngan sa Banat News), residente sa Juan Luna Avenue sa maong barangay, usa ka trabahante sa usa ka carwash sa maong lugar nakaangkon og samad pinusilan sa iyang tuong bukton nga milapos sa iyang dughan nga maoy hinungdan sa iyang hinanaling kamatayon.

Samtang laing kauban sa biktima nga nagpangidaron og 16-anyos usab ang nakaangkon og mga bun-og sa lawas human gitabangan og kulata sa mga miyembro sa gang.

Base sa imbestigasyon sa Homicide Section, ang biktima uban sa iyang duha ka higalang nagpangidaron og 16-anyos gikan sa usa ka birthday party.

Ang tulo misakay sa 03L nga pasaheroan padulong sa Mabolo apan natanggong sa trapiko sa maong dapit ug diha-diha kalit nga miabot ang mga gikatahapan ug gibunlot ang duha sa walo ka batan-on paubos sa pasaheroan.

Diha-diha gitabangan sila og kulata apan ang usa sa mga gikatahapan nga ginganlan og ‘Marjun’ ang kalit lang nga mipusil sa 17-anyos ug human niini daling nangikyas palayo sa maong lugar.

Matud pa sa kapolisan nga naalaan lang ang biktima nga miyembro sa Crips Gang sanglit ang 16-anyos gyud nga nabun-og mao gyuy miyembro sa maong grupo.  (BANATNEWS)