Hubog nga polis namugos og sulod sa balay

CEBU, Philippines - Usa ka polis nga giingong hubog gipasanginlang mipugos og sulod sa boarding house sa igsoon sa iyang higalang babaye nga nakapakurat sa hingtungdan didto sa barangay Poblacion, dakbayan sa Talisay sa miaging gabii.

Si Felisa Romano, 20, dalaga, maoy misumbong ngadto sa kapolisan sa Talisay Police Station bahin sa gibuhat ni Geofrey Borinaga nga naghatag kaniya og tumang kahadlok.

Matud ni Romano nga si Borinaga, nga taga barangay Canduman, dakbayan sa Mandaue kinsa usa ka polis nga nadestino sa maong dakbayan hubog kaayong misulod sa boarding house sa iyang maguwang nga maestra sa barangay Poblacion, dakbayan sa Talisay ug nakiglalis kaniya nga walay igong rason.

Si Romano niadtong higayona nag-inusara sa maong boarding house dihang miabot si Borinaga.

.Ang Banat News mitawag sa Administration Office sa Mandaue City Police Office (MCPO) pagpiho kung si Borinaga usa ba gyud ka polis sa maong dakbayan.

Apan gipanghimakak kini ni Juliet Velasquez, usa ka non-uniform personnel sa MCPO kinsa nagkanayon nga wala sa ilang listahan sa organic personnel ug Field Training Program (FTP) ang nahisgutang ngalan.  (BANATNEWS)