CEBU, Philippines - Wala pa matino ang gidak-on sa kantidad sa kuwarta ug mga mahalong butang nga gikiriw sa wala hiilhing kawatan nga milungkab sa Treasurer’s office sa lungsod sa Cordova kagahapon sa kaadlawon.Usa ka collector sa Treasurer’s office nga si Juliet Tampus maoy mi-report sa kapolisan sa maong lungsod human madiskobrihe niini nga abli na ang pultahan sa maong buhatan nianang alas 7:45 sa buntag sa iyang pag-abot kagahapon.
Si PO2 Dennis Camunay sa Cordova Police Station mibutyag sa Banat News nga hangtud kagahapon sa hapon wala pa mahuman pag- imbentaryo sa mga butang sa sulod sa opisina nga gihimo sa mga sakop sa Scene of the Crime Operatives ( SOCO) .Matud ni PO2 Camunay nga ang mga kawatan didto moagi sa luyong bahin sa buhatan pinaagi sa pagguba sa mga decorative block ug didto sa sulod gihakot ang kuwarta nga wala hisayring kantidad uban ang mga mahalong butang.
Hinoon nakakuha og mga finger print ang kapolisan gikan sa drawer sa collector table ingon man mga footprint nga gieksamin pa karon sa PNP crime laboratory. (BANATNEWS)