Mga vendors pabor nga pabayron og buhis ang mga tigpautang nga Bombay

CEBU, Philippines - Uyon gyud ang mga tindera diha sa Zamora St. sa barangay Sto. Niño ning dakbayan nga pabayron na og buhis ang mga Indian nga gitawag og mga Bombay o Turko nga tigpautang kanila. Sagad sa mga nakahinabi sa Banat News nga mga vendors diha sa maong dapit miuyon sa planong ordinansa ni Konsehal Nida Cabrera atol sa ilang session diha sa City Hall nga pabuhisan na maong negosyoha.

Si Josephine Cosep, 46, nagpuyo sa dalan Logarta ug usa ka manindahay og prutas kinsa naabtan pa sa Banat News nga bag-uhay lang mitunol og ‘data’ sa ngadto sa usa ka Bombay miingon nga pabor siya sa maong ordinansa.

Sumala pa niya nga kun silang mga vendors mobayad gani og P20 nga tiket sa City Hall aron makapaninda nganong dili man usab mahimong pabayron og buhis kining maong mga tigpautang.

Dugang pa niya nga kining maong mga Bombay nagdawat lang og limpyo. Pipila kanila ang saputon ug mangasaba pa kanilang mga nakautang kun makapalta sa ilang bayrunon.

“Uyon ko kay sila ray madato ug kami diri nag-antos kay dagko kaayo ang ilang pinatungan sa ilang gipautang dinhi namo,” matud pa ni Abet Cabayan usa usab ka manindahay og prutas.

Si Carmen de la Cruz usa ka flower vendor dihang gikuhaan usab sa Banat News sa iyang reaksyon mibutyag nga aduna pay laing estilo ang mga Bombay nga dili sila makausab og pangutang og puhunan kun dili sila mokuha og laing item nga utangon gihapon.

Kini sama sa habol, punda, kaldero, electric fan ug uban pa nga giingong dagko kaayo og patong kun paliton sa mga tindahan. Dugangan pa niini ang taas kaayong interes nga P100 sa matag P500 nga utang nga cash. Si dela Cruz miangkon nga tungod sa maong sistema sa mga Bombay imbes makatabang kanila nahimo hinuon kining hinungdan nga nisamot sila og kalubong sa utang apan wala sila’y mahimo kay wala sila’y kapaingnan.

Kagahapon, ang Indian kon Bombay nga naningil kang dela Cruz dihang gisuwayan og kuha sa Banat News og pamahayag kabahin sa ordinansa nagdumili sa pagtubag ug nagdali nga misakay sa ilang motorsiklo ug misutoy palayo. (BANAT)