CEBU, Philippines - Gumikan sa paggamit og pino nga pukot, usa ka illegal nga matang sa panagat, nasikop sa mga otoridad sa kapolisan ang lima ka mananagat didto sa barangay Paz, lungsod sa Poro, isla sa Camotes sa miaging adlaw.
Ang gipriso na karon didto sa Poro, mao sila si Ulysis Retor, 44, minyo, ug ang pulos ulitawong sila si Weljohn Retor, 22, Lloyd Retor, 22, Paterno Curaza, 26, ug Beltran Pilota, 26, pulos taga barangay Kawit, lungsod sa Pilar ang tanan.
Nasayran sa Banat News, nga nasakpan sa akto sa kapolisan nga gipangulohan ni PO2 Jeremias Geromo uban ni municipal fishery coordinator Elizabeth Costas, ang mga suspetsado nga nagladlad sa ilang pukot nga bahan, matang sa pukot nga pino kaayo og mata. Dihadiha gawas sa 70 metros nga pukot, gisakmit usab sa mga otoridad lakip ang pumpboat nga gisakyan sa mga suspetsado, ug nagkadaiyang klase sa isda nga ilang nakuha isip ebindesya. (BANAT)