CEBU, Philippines - Wala makaipsot sa mga kamot sa kapolisan ang usa ka gipasanginlang notadong drug pusher sa barangay Looc dakbayan sa Mandaue human kini masikop sa buybust operation sa milabay’ng gabii.
Ang nasikop mao si Melvin Setenta alyas Cocoy, 46, residente sa maong dapit kinsa nakuhaan og tulo ka gagmay’ng pakete ug drug paraphernalia.
Si Insp.Wilson Abot, ang officer in charge sa Station 5 uban sa iyang mga sakop maoy mihimo sa buybust operation pasado alas–onse sa milabay’ng gabii sa maong dapit tungod sa impormasyong si Setenta ug kauban namaligya og shabu sa maong dapit.
Atol sa maong operasyon nakuha gikan ni Setenta ang maong pinaketeng gituhoang shabu ug mga gamit sa pagsuyop niini, samtang ang wala mailhing kauban ni Setenta dali nga nakabiya sa maong dapit.
Matud pa ni Abot nga dugay na nilang gipanid-an si Setenta sa illegal nga pagpamaligya og drugas sa maong dapit ug tunog na kaayo ang pangalan niini. (BANAT)