2 ka hubog nga nagmotor tipi sa bangga

CEBU, Philippines - Pulos nabuak ang ulo sa drayber sa motorsiklo ug sa angkas niini gikan nga namista tungod sa pagbangga nila sa gikasugat nga sakyanang adunay giguyod nga laing sakyanan diha sa kurbadahong dalan sa sitio Talisay barangay Poblacion lungsod sa Boljoon niadtong Lunes sa alas 11:55 sa udto.

Ang mga nangamatay mao ang tag-iya ug drayber sa motorsiklo nga si Wilfredo Caitor, 37, ug ang angkas niini nga si Harry Legarte, 33, pulos molupyo sa sitio Baladhan barangay Arbor, Boljoon.

Samtang ang drayber sa gikabangga niining Toyota High Ace pickup gipanag-iya sa CEH Marketing sa Mandaue City mao si Joel Barino, 55, molupyo sa San Vicente, Liloan.

Matud pa ni SPO4 Cristino Uraca, deputy chief sa Boljoon police dihang nahinabi sa Banat News nga giguroy og laing sakyanan ang sakyanan ni Barino padulong sa usa ka shop niadtong tungura.

Apan pag-abot sa maong dapit kalit nga mibutho ang motorsiklo nga giingong nag-zigzag ang padagan ug ang mga sakay pulos wala magsul-ob og helmet.

Pag-abot sa kurbadahon nga bahin diretsong misampak ang maong motorsiklo sa giguyod nga sakyanan ug si Caitor didto mobanda nga nag-una ang ulo sa sakyanan una pa motugpa sa karsada nga nag-una ang ulo.

Samtang ang angkas nga si Legare tungod sa kakusog sa impact nalagpot palayo sa motorsiklo ug nag-una ang ulo pagtugpa sa sementado nga dalan.

Gisuwayan unta og hatud sa Oslob District Hospital ang mga biktima apan pulos gideklarar nga dead on arrival ug kasamtangang giimbestigar sa kapolisan ang drayber sa sakyanan sa nabanggaan sa duha.

Dugang nahipos nga impormasyon nga gikan nga namista sa barangay Granada ang mga biktima ug pulos nakainom ug wala magsul-ob og helmet ug nasuta usab sa kapolisan nga walay lisensya si Caitor.  – BANAT NEWS