CEBU, Philippines - Mga barangay tanod sa dakbayan sa Mandaue gilaraw nga ipailawom sa random drug test ni Mandaue City Mayor Jonas Cortes aron pagsigurong wala sila malambigit sa paggamit sa illegal nga drugas.
Nanghinaot si Cortes nga mokooperar ang mga tanod ug barangay officials alangusab sa epektibong kampanya pagsumpo sa ilegal nga drugas sa kabarangayan.
Ang dakbayan gikatakdang mogahin og pundo alang sa magastos sa maong plano.
Sumala pang Cortes nga kinahanglang luwas ug limpyo ang mga barangay tanod sa kalambigitan sa paggamit sa illegal nga drugas aron mahimo usab kining epektibo sa ilang pagtabang sa pagsumpo sa illegal nga kalihokan sa ilang barangay.
Dako ang pagsalig ni Cortes sa ikatampo sa mga barangay tanod alang sa pagmentinar sa kahapsay ug kalinaw sa mga barangay isip kaabag sa kapolisan.
Gawas sa ilegal nga drugas ug mga ilegal nga kalihukan buot usab ni Cortes nga adunay dakong papel sa mga barangay tanod sa kampanya alang sa kalimpyo sa dakbayan pinaagi sa pagtabang sa publiko nga magmatngon ug dili magpataka og labay sa ilang mga hugaw. (BANATNEWS)