Mga residente mipasaka'g petisyon vs KEPCO ug SPC

CEBU, Philippines - Mipasaka og petisyon ang mga molupyo sa dakbayan sa Naga ug Toledo batok sa Salcon Power Corporation (SPC) ug Korean Power Electric Corp. (KEPCO) gumikan sa alegasyong pagpataka niini og labay og coal ash sa ilang mga lugar.

Ang mga residenteng misang-at og kaso pinangulohan sa mga environmental lawyers nga sila si Benjamin Cabrido sa Philippine Earth Justice Center Inc. ug Atty. Gloria Ramos, nabalaka sa kahimtang sa panglawas gumikan sa maong abo.

Sumala pa sa grupo nga adunay mga makadaot nga kemikal sama sa mercury, cadmium ug arsenic nga maoy hinungdan sa mga sakit nga kanser, sakit sa panit ug paglisod sa pagginhawa ug uban pang matang sa sakit.

Mipasaka ang grupo og petisyon nga mopagawas ang korte og environmental protection order.

Si Vince Cinches, ang executive director sa Fisherfolk Development Center,Inc. Central Visayas nagkanayon nga ang walay klarong tambakanan sa coal ash nagbutang sa peligro sa tinubdan sa pagkaon, tubig ug kinaiyahan.

Si Cabrido mikutlo sa Akta Republika 9003 nga nagmando sa tanang mga power plants sa nasud nga mosunod sa ecological solid waste management program. – BANAT NEWS