Sikyu naghikog kay gibiyaan sa uyab

CEBU, Philippines - Usa ka guwardiya kinsa gituohang naguol kay gibiyaan sa hinigugma naghikog sulod sa lawak sa ilang balay sa sitio Ibasan, barangay Banilad, ning dakbayan sa Sugbo kagahapon sa alas 6:00 sa buntag.

Ang nagpakamatay kinsa naghikot og pisi sa liog mao si Renato Caballes, 30, ulitawo, ug usa ka guwardiya nga taga Ibasan.Sa gihimong pakisusi ni SPO2 Roger Nedamo ug mga kauban sa homicide section sa Cebu City Police Office nasuta nga walay samad ug bun-og ang kalawasan ni Caballes, gawas sa pisi sa iyang liog kansang pikas tumoy gigaid usab sa sagbayan sa ilang balay. Si Eduardo Caballes, 60, amahan sa naghikog miasoy sa kapolisan nga nianang alas 6:00 sa buntag iyang gisusi ang kuwarto sa iyang anak kun nakalakaw na ba kini paingon sa trabahoan.Apan nasurprisa ug nakurat ang amahan sa iyang nakita nga nagbitay na sulod sa kuwarto ang iyang anak nga wala nay kinabuhi.Si Angelita Caballes inahan sa nagpakamatay nga guwardya mitug-an usab kang SPO2 Nedamo nga naguol iyang anak tungod kay ang hinigugma niini nga mabdos nga ginganlan lang og “Jean” nananghid nga muoli sa ilang lugar didto sa Negros aron mobakasyon ug mipasalig kini nga mobalik sa ilang pinuy-anan apan hangtod karon wala na gyud kini mopatim-aw.

Gituohan sa inahan nga mao kini gikagul-an og maayo sa iyang anak hinungdang nakahukom kining maghikog.Hinuon ang kapulisan sa dakbayan mirekomendar sa pamilya nga ipailawom sa autopsiya ang patay’ng lawas ni Renato aron masuta gyud kun wala bay foul play ang pagkamatay niini. - BANAT NEWS