Ex-US navy nasikop

CEBU, Philippines - Kanhi sakop sa Regional Mobile Group RMG-7 ug kanhi sakop sa US Navy gidakop sa iyang gipuy-an sa Poblacion, lungsod sa Argao niadtong Lunes sa kaadlawon human malutsi og warrant of arrest sa kasong murder.

Ang nadakpan mao si kanhi PO1 Mark Gregory Devenagracia, 43, lumad nga taga Poblacion, Ginatilan, kasamtangang nagpuyo na sa Argao ug kanhi sakop sa RMG-7 nga nagbase sa Sibonga ug kanhi usab sakop sa US navy sa wala pa masakop sa PNP.

Matud ni PO1 William Cordova sa Oslob Police Station sa dihang nahinabi sa Banat News ang ilang kauban nga polis nga si PO3 Nelson Saquibal nga taga lungsod sa Argao ug nadestino sa Oslob maoy nakasikop kang Devenagracia.

Gidala dayon ni PO3 Saquibal sa Oslob Police Station ang dinakpan ug temporaryong gibalhog samtang nakig-alayon ni Regional Trial court judge Ramon Hemalaloan sa Oslob alang sa pagpadala kang Devenagracia ngadto sa Cebu Provincial Detention and Rehabilitation Center (CPDRC).

Walay girekomendar nga piyansa alang sa temporaryong kagawasan ni Devenagracia human usab giingong nagtagotago na kini sa dihang nalutsan og warrant.

Si PO3 Neil Mansueto sa Ginatilan Police Station nga paryente ni Devenegracia mibutyag sa dihang nahinabi sa Banat News nga gilambigit ang kanhi polis ug US Navy sa nahitabong pagpamusil-patay sa Malabuyoc niadtong Hulyo 2009 nga pending pa karon ang kaso sa korte.

Dugang ni PO3 Mansueto nga human maundang sa US Navy si Devenagracia misulod kini sa PNP ug nadestino sa nabungkag nga Presidential Anti Organize Crime Task Force (PAOCTF).   - BANAT NEWS