Land title sa Tesda susihon - Sepulveda

CEBU, Philippines - Gisugdan na sa Kapitolyo ang pagsusi sa dali nga pag-isyu sa transfer of land titles sa 1.5 ka hektaryang lote nga giukopahan sa Technical Education Skills Development Authority (TESDA) sa may Salinas Drive, Lahug ning dakbayan.

Kini human gibasura ni RTC-7 branch 16 Judge Sylva Aguirre-Paderanga ang apelasyon sa Kapitolyo sa pagpa-eject sa TESDA aron mabawi ang maong lote sa Kapitolyo.

Matud pa ni capitol consultant on information Rory Jon Sepulveda nga nahibawo na silang daan nga mapildi ang ilang kasong ejectment sa korte tungod kay nakapamatuod man ang TESDA nga duna silay transfer of land title.

 Apan gitataw ni Sepulveda nga ang Provincial Attorney's Office nagpadayon karon sa pagsusi sa pagdali sa pag-isyu sa maong land title.

Gipasabot ni Sepulveda nga sa wala pa moduso og ejectment case ang Kapitolyo mipadala sila og sulat sa labaw nga opisyal sa TESDA pagpangutana kun may land title na ba kini sa maong luna.

Matud pa gipahibalo sila niini nga wala pa mabalhin ang maong titulo hinungdan nga ilang gipasaka ang maong kaso.

Si Sepulveda miingon nga wala masayod ang Kapitolyo sa hilom nga pagbalhin sa land title sa maong luna ngadto na gyud sa TESDA.

Matud pa ni Sepulveda nga magpaabot sila sa resulta sa pakisusi ni Provincial Attorney Mariano Martinquilla sa dili pa sila mohimo og dugang legal nga lakang. (BANATNEWS)