2 babaye; 1 dalagita nasikop sa buybust

CEBU, Philippines - Patay ang usa ka 56-anyos nga ginang nga mag-uuma kinsa gituohang hubog ug aksidenteng natagak sa seawall sa baybayon sa barangay Poblacion sa lungsod sa Borbon niadtong Miyerkules sa alas 6:30 sa buntag. Ang napalgang patay na nga naglutaw-lutaw sa dagat mao si Buenventura Urot Monleon, 56, minyo, ug molupyo sa bukirang bahin sa barangay Bongoyan sa samang lungsod.

Matud ni SPO2 Morie Magdadaro sa Borbon Police Station dihang nahinabi sa Banat News sa gihimong imbestigasyon, usa ka mananagat nga si Celestino Orio, molupyo sa maong lugar ang nakadiskubre sa patay’ng lawas ni Monleon diha sa dagat.

Gi-report dayun kini sa kapulisan ug didto nasuta ang pangalan niini ug sa gihimong pagsukit sukit sa kapulisan sa mga molupyo sa maong lugar.

Sumala pa nga unang nakit-an ang ginang nianang pagkaalas 8:00 pa sa gabii niadtong Martes nga dunay kaubang gihinganlan nga si Sebastian Monroid, ug ang duha pulos hubog diha sa seawall.

Ang municipal health officer nga si Corazon Dotillos subay sa gihimong eksaminasyon ngadto sa patay’ng lawas ni Monleon nagkanayon ang biktima gi-atake kini sa kasing-kasing ug natagak sa seawall.

Apan didto kini motugpa sa lawom nga bahin sa dagat hinungdan sa pagkalumos patay. Samtang usa ka patay’ng lawas sa wala hiilhing lalaki nga gituohang nalumos ang napalgang naglutaw sa kadagatan sa Bantayan Wharf sa barangay Poblacion sa lungsod sa Cordova alas-8 pasado ang takna sa buntag niadtong miaging adlaw. Si PO2 Manfred Maarat nga nahinabi sa Banat News miingon nga si Rodrigo Sultan nga usa sa mga marine watch sa nahisgotang lungsod maoy nakadiskubre sa maong patay’ng lawas.

Gibanabanang anaa sa 40-anyos ang panuigon sa maong lalaki ug kasarangan lamang ang gidak-on sa panglawas nga gituohang gianod lamang sa maong dapit. Ang maong patay’ng lawas kasamtangang gipahiluna sa Saint Francis Funeral Homes sa nahisgotang lungsod. - Romeo Limpangog ug Darrel Carumba (BANAT NEWS)