CEBU, Philippines - Gihulagway sa City Attorney’s Office nga si Atty. Joseph Bernaldez nga dili mosaler ang hagit sa kampo ni Cebu City Medical Center (CCMC) credit officer Maria Lourdes Archua nga mokiha ngadto kang Mayor Michael Rama ug sa mga tawo nga nagpaluyo sa iyang suspensyon.
Si Archua gisuspenso og 30 ka adlaw sugod niadtong Hulyo 22 tungod sa nagpadayong imbestigasyon sa nangahanaw nga 28 ka mga tseke sa Philippine Health Insurance Corp. (Philhealth) nga nagkantidad og P240,000.
Matud pa ni Bernaldez nga wala’y basehan ang hagit sa abogada ni Archua nga si Gloria Lastimosa-Dalawampu gumikan kay igo lang sila mibuhat sa ilang mga trabaho ug ang ilang gihimo nga pagsuspenso ni Archua kabahin lang sa gibuhat nila nga imbestigasyon.
Samtang sa bahin ni Rama, mipadayag kini andam silang moatubang sa hagit ni Archua sanglit usa kini sa iyang trabaho isip mayor.
Kahinumduman nga gipadayag sa miaging adlaw ni Dalawampu nga dili makiangayon ang pagsuspenso og 30 ka adlaw sa iyang kliyente.
Si Dalawampu ug Archua miadto sa buhatan sa National Bureau of Investigation-7 niadtong milabay’ng adlaw alang sa pagtan-aw sa hulagway ni Concha Ruth Adlawan nga giingong maoy nagdawat sa tseke human magpakaaron-ingnong sakop kini sa Philhealth.
Si Archua mihingalan sa usa ka Mary Grace Lopez sa city treasurer’s office nga maoy nagpagawas sa tseke maong dili makiangayong siya maoy suspensuhon.
Samtang sugdan na karong adlawa ang preliminary investigation kalabot sa maong kaso ug giingong ipatawag sa buhatan sa City Attorney’s Office sila si Archua, CCMC Chief Myrna Go ug ang City Treasurer’s Office utility worker nga si Mary Grace Lopez. – BANAT NEWS