Young ok ra sa lingam

CEBU, Philippines - Pabor si Bise Mayor Joy Augustus Young nga maka-operate ang mga ‘lingam massage’ parlors dinhi sa dakbayan apan kinahanglang adunay higpit nga guidelines niini nga magdili sa imoralidad.

Matud pa ni Young nga walay problema ang lingam massage gumikan kay base sa pamahayag sa mga higala niya mga doktor, giingong usa kini ka alternatibong paagi sa pag-ayo sa prostate cancer.

Gusto ni Young nga moduso og ordinansa nga kinahanglang seguraduhon sa mga nanag-iya sa maong negosyo nga wala silay imoralidad nga gibuhat ug dili usab pasudlon ang mga minor de edad .

“Dili nato malalis nga daghan kaayo og mga turista nga moanhi og Cebu ug magpa-lingam massage maong plano ko nga makighinabi sa mga konsehal nga nahisakop sa mga komitiba sa turismo ug sa health nga matun-an ang mga posibeng guidelines sa maong negosyo,” matud pa ni Young.

Kahinumduman nga pipila na ka lingam massage parlors ang napasirad-an sa dakbayan sa Mandaue ug Lapulapu gumikan sa kakuwang niini sa mga sanitary permits ug pagdudang nalambigit kini sa prostitusyon.

Sa laing bahin, nakadawat na sa listahan sa mga pangalan si Mayor Michael Rama nga maoy mamuno sa subling pagbanhaw sa Cebu Anti-Indecency Board (CAIB) nga gipangulohan kaniadto ni Dr. Rene Joseph Bullecer.

Matud pa ni Rama nga duna na’y gipangrekomendar kaniya apan dili pa niya kini buot itug-an sanglit iya pa nga susihon ang ilang kapabilidad niini. Gusto sa mayor nga ang mapiling tsirman sa CAIB , aduna gyu’y katakos sa pagsulbad sa mga imoralidad lakip na ang pagsusi sa mga lingam   massage sa dakbayan. (BANATNEWS)